放假中‧‧‧‧

小女子仍在放大假中,啱啱同我個小學兼中學同學老死emily去咗曼谷三日,狂食狂行街狂揼骨,非常之滿足,不過我真係對泰國啲的士司機有恐懼症,明明喺機場去酒店都只係需要200 baht 之嘛,佢夠膽死開價500 baht 囉‧‧‧‧






一去到曼谷,我哋就即刻衝咗去Four Season Hotel 食佢出名嘅Sunday Brunch Buffet, 全部香檳、紅酒、白酒、鵝肝、牛排、龍蝦等任食任飲,嘩日頭流流點食到咁多嘢呀？！見到啲鬼佬不知幾高漲咁喺度狂隊酒,佢哋就抵哂啦,我哋兩個就回唔到本啦,每人成2500 baht,即五百幾元港紙呀,嗚嗚‧‧‧‧不過唔怕,呢餐emily請我,多謝你尹佬！











食完之後我哋就去咗行翟道翟週末市集,點知行唔夠半個鐘我哋就宣佈放棄啦,嗰種熱同焗真係非一般人可以接受,所以尊貴的我們都係決定去行啲有冷氣嘅商場,哈哈！而隔離嗰啲咁可愛嘅公仔吊飾係我哋行Suan Lam Night Bazzar時買嘅,我買嚟送俾我啲親愛嘅朋友仔們,希望你哋鍾意呀！(雖然香港都有,不過呢幾隻唔同咖,我特登响泰國買返嚟咖！)



最後一擊,臨走前喺雪糕屋食咗個朱古力火煱，九個雪糕 十 香蕉 十 蜜瓜 十 香蕉 十 Brownies 十 Waffles 十 一大兜朱古力漿,嘩搞到我哋兩個捧住個肚走‧‧‧‧






再見了曼谷！I'll be BACK ！！

更多靚相, CLICK HERE: http://community.webshots.com/user/yehtn